فضفضه

Name:
Location: cairo, Egypt

Wednesday, December 14, 2005

عريس الغفله

انا طول عمري مؤمنه جدا بالزواج عن حب و رافضه جدا جدا للزواج التقليدي او زواج الصالونات مهو انا مش قادره اتخيل ازاي اتنين ميعرفوش بعض خالص يشوفو بعض مرتين تلاته وسط الاهل وبعدين يقرروا بقضوا بقيه حياتهم مع بعض
رغم ان الاساليب دلوقتي اتطورت يعني مبقاش جواز صالونات بقي جواز نوادي و كافيهات بمعنى ان العريس بدل ما ياخد اهله و يروحو بيت العرسه يتقدمو على طول بيتقابلو في النادي او اي كافيه او ي مكان عام ده طبعا مع حضور الامهات او الاصدقاءو في نص القعده بعد الناس ما يتعرفو على بعض كويس تلاقى الناس سابوهم وقامو باي حجه انهم يتمشو شويه مثلا وده بيديهم فرصه يقعدومع بعض يتكلمو لوحدهم شويه وطبعا المقابلات دي بتتكرر كذا مره لحد ما يعرفو بعض كويس و بعدين تتم الخطوات الاساسيه اللي كلنا عارفينها يعني يجي اليت يخطبها رسمي والموضوع يمشي في مساره الطبيعي
ورغم ان الاسلوب ده اثبت نجاح كبير الا اني طول عمري كنت بهرب من اي محاولة ترتيب مقابله مع عريس ده طبعا قبل ما اتخطب لاني انا مبفهمش ازاي ممكن اكون على طبيعتي و الانسان اللي هشوفه ده برضه ازاي هيكون على طبيعتو و احنا الاتنين عارفين اننا جايين نتفرج على بعض
اللي خلاني افتح الموضوع ده النهارده موقف غريب جدا حصل لواحده من اصحابي الوقف كالاتي حد من معارفها جابلها عريس و بعدين والدة العريس اتصلت بوالدتها عشان تتعرف عليها ويحددو معاد و مكان يتقابلو فيه بس والدة صحبتي فوجئت بوالدة العريس بتطلب منها انها تيجي تزورها في البيت لوحدها من غير العريس !!1
طبعا رغم ان الحكايه شكلها مريب شويتين بس والدة صاحبتي اتحرجت و معرفتش ترد و طبعا قالتلها اتفضلي تنورينا و الكلام بتاع المجاملات العاديه ده لحد كده الموضوع غريب شويه بس عادي يمكن والدة العريس عايزه تتعرف على البيت و الناس قبل ما تجيب ابنها و الموضوع يبقى رسمي المهم في يوم الزياره اللي اتفقو عليه فوجئت صاحبتي و والدتها بوالدة العريس و والده معاها رغم انها قالت انها هتروح لوحدها هنا بقى بدات علامات الاستفهام تكتر. ليه قالت هتيجى لوحدها ؟ وليه جابت جوزها معاها؟ وليه مجابوش ابنهم؟؟!!1
المهم الناس كانو ظراف جدا و محترمين وانسجمو مع بعض و انتهت القابله على سلام و تاني يوم اتصلت والدة العريس و قالت ان ابنها طلب ييجى يزورهم بس والدة العروسه فضلت انهم يتقابلو بره المهم بعد الداولات تم الاتفاق على الزمان والمكان و يوم المقابله راحت صاحبتي و والدتها للمكان المتفق عليه و جدو والدة العريس منتظره لوحدها في ايه يا حاجه قالت اصله بيركن العربيه فضلو مستنين لمدة نصف ساعه و لما مجاش راحت مامته تدور عليه و الغريب انها راحت جابته و جت على طول كانه كان قاعد في العربيه مش عايز ييجي المهم ظهر اخيرا عريس الغفله مكشر مش طايق نفسه و بيتكلم مع والدته باسلوب وحش جدا يعني من الخر قليل الادب طبعا في ثواني قبل ما يلحق يقعد على كرسيه كانت صاحبتي و والدتها اعتذرو و غادرو المكان
تاني يوم اتصلت و الدة عريس الغفله و حاولت و الدة صاحبتي تتهرب منها بس اصرارها في الاخر خلاها تكلمها و تسمع اعتذاراتها عن سوء خلق ابنها و بصراحه والدته كانت محرجه جدا و مكسوفه على الاخر وقالت لوالدة صاحبتي ان انها مش عارفه هو عايز ايه و انه قليل الادب فارض واحده عليهم و هم مش موافقين عليها المهم والدة صاحبتي لادبها معرفتش ترد عليها الرد اللي تستحقه و انتهى الموضوع
انا لما سمعت الحكايه دي قلت فعلا اللي يعيش ياما يشوف
ازاي يدخلو بيوت الناس و هما عارفين ان ابنهم مش موافق؟
وازاي صاحبتي و والدتها كانو ماشين في الموضوع رغم غرابة تصرفات الناس دي؟
و ليه والدة عريس الغفله ترضى على نفسها الموقف اللي اتحطت فيه من ابنها قدام ناس غرب؟
اسئله كتيره مش لاقيه ليها اجابه

Wednesday, December 07, 2005

I'm a lily :)


You Are A Lily




You are a nurturer and all around natural therapist.

People see you as their rock. And they are able to depend on you.

You are a soothing influence. You can make people feel better with a few words.

Your caring has more of an impact than even you realize.

Tuesday, November 29, 2005

Quote of the day

No man is truly married

until he understands

every word his wife is NOT saying!!!.

~ by Unknown ~

لو ده حقيقي يبقى مفيش ولا راجل متجوز في العالم

Tuesday, November 15, 2005

Crouching Tiger Hiding Dragon

امبارح رجعت من الشغل متاخره قوي مكنش فيه حد في البيت وبعد ما اتغديت كلمت خطيبي و طبعا خدتلي كلمتين عشان اتاخرت وعشان مكلتش حاجه طول النهار(بحبه قوي لما بيتخانق معايا عشان اكل زي ما اكون عيله رغم اني بزهق من الزن قوي) بس في الاخر صعبت عليه عشان كنت تعبانه قوي و عندي صداع نصفي قاتل فقرر اني لازم انام
انام الساعه تسعه يابني انت حد بينام بدري كده
معلش حاولي

المهم قدام اصراره و انا كمان كنت تعبانه جدا مش قادره اجادل قلت ماشي احول انام بس طبعا انا مش من الناس اللي بيعرفو ينامو بدري مهما كانو تعبانين ففضلت صاحيه في السرير فتره لحد ما اخويا جه و شغل التلفزيون سمعت موسيقى انا عارفاها و بحبها بس مفتكرتش بتاعة ايه المهم الفضول و الارق دفعوني اقوم ابص و مصدقتش نفسي من الفرحه
Crouching tiger hiding dragon
يااااه انا كنت ناسيه الفيلم ده انا وقعت في حبه من اول مره شفته في السينما و من ساعتها و انا بموت فيه(رغم اني عمري ما تخيلت اني احب فيلم صيني) بس بقالي فتره مشفتوش و نسيته

بحس كده و انا بشوفو اني بشوف حلم كمية مشاعر واحساسيس مليا الفيلم تخليك تسرح و تنسى كل حاجه و تندمج بس معاه
بحب قوي لي موباي البطل عامل بالظبط ابطال الاساطير من اول ثانيه في الفيلم بتعرف انه بيحب تشي و هي كمان بس مصارحوش بعض بالحب ده وفاء لذكرى خطيبها اللي كان صاحبه و مات في معركه.
جميل قوي الدفئ اللي بينهم و الحب اللي مالي نظراتهم من غير ما يقولو كلمة حب واحده بس تحس حبهم طول الوقت
طريقة الفلاش باك رائعه و بتملى احداث الفيلم بطريق شاعريه جدا و حالمه قوي
كمية المشاعر المتناقضه اللي داخل جين تخليك متبقلش عارف تحبها و لا تكرها . مشاعرها المتناقضه بين حبها لقاطع الطريق و التحولات في مشاعرها بين الكره و الاحتقار و بين الحب و بين عائلتها الغنيه و خطيبها
كمان مشاعرها المتناقضه بين الخير المتمثل في موباي اللي بتحترمه و بتحول تبقي زيه بس بتظهرله الكره و العداء وبتحاربه وبين الشر المتمثل في مربيتها اللي بتكرهها و بتحتقرها بس في نفس الوقت بتدافع عنها

مقدرتش امنع دموعي في النهايه لما اصيب موباي كاي بطل اسطوري بعد ما قتل غدوته و موته في حضن حبيبته و اعترافه بحبه باخر نفس قبل ما يموت(يعني انا كنت ناقصه تقطيع قلب)
كمان رجوع جين لحبيبها مع شعور بالذنب لموت موباي و اجمل مشهد من وجهة نظري هو مشهد طيرنها من فوق الجبل في النهايه

طبعا انا مش هتكلم عن التصوير و الاضاءه و الاخراج و التمثيل و هسيب اربع جوايز اوسكار يتكلمو
بس الموسيقى التصويريه كانت اكتر من رائعه بتدخلك في جو الفيلم و يعيشك جواه
الغريبه ان الصداع مرحش بس انا نسيته تماما طول مانا بتفرج على الفيلم
كفايه كده النهارده انا طولت عليكو قوي اروح الحق اخدلي كلمتين تانين من خطيبي عشان ضحكت عليه و منمتش وارتحت كويس امبارح

Thursday, October 27, 2005

Question

How far r u willing to change for the one u love?
اتسألت السؤال ده من فتره و رغم اني حسيت ان فيه خدعه في السؤال و مكنتش عايزه اجاوب الا اني قررت اجاوب في الاخر بس عشان محسش اني جبانه
Am willing to change but not to the extent that I become another person

جاوبت رغم اني مش عاجبني السؤال اصلا متهيألي ان كل علاقه بتحتاج ان كل واحد يغير في نفسه حاجات عشان يعرف يتعايش مع الانسان اللي بيحبه بس لازم فكرة التغيير دي تيجي من المعايشه و الحب و بدون اجبار من الطرف التاني...مش يكون هو ده الاساس في العلاقه اننا نحاول نغير بعض
"انا بحبك بس لازم تغير في نفسك كذا وكذاعشان نعرف نعيش"

مهو الحب من وجهه نظري مش مشروط الحب هو انك تحب الطرف التاني وتتقبله زي ما هو.. تحب مميزاته و كمان تحب عيوبه مش تحاول تغيره عشان يتماشى معاك و مع طباعك طيب حبيته ازاي من الاول لو كان مش عاجبك؟؟؟

مش عارفه يمكن انا غلط بس انا محتاجه رأيكو مفيش انسان كامل كلنا عندنا عيوب و الانسان الذكي هو اللي يعرف عيوبه كويس

يس ممكن تتقبل من حد انت بتحبه انه بطلب منك انك تغير نفسك عشانه؟
ولو وافقت لاي مدى ممكن تتغير؟
وتتغير ليه؟
و حتى لو كنت مش شايف ان الحاجات اللي الطرف التاني عايزك تغيرها عيوب فيك اصلا؟
وهل ممكن انت تطلب من حد انت بتحبه يتغير عشانك؟
ويكون ايه شعورك لما تلاقي كل الناس متقبله فيك حاجات واللي بتحبه مش متقبلها و عايزك تغيرها؟
طيب و هو ينفع الحب يكون بشروط؟

Sunday, October 23, 2005

يمكن انا معنديش موهبة الكتايه خالص بس لقيت التدوين فرصه اعبر بيها عن حاجات عايزه اقولها واسمع فيها اراء لناس تانيه لاني مش من التاس اللي بتعرف تعبر عن نفسها بالكلام قوي يعني حاله من حالات الفضفضه

من ساعة ما ابتديت تدوين وانا حريصه اني اتابع المدونات التانيه وفعلا اكتشفت مدونات ظريفه جدا زي
  • night legend
  • ورأيه العاقل جدا واسلوبه المريح كمان كان اول واحد علق على مدونتي..
    مدونه كمان اكتشفتها و هي رضوى
  • هكذا انا
  • انسانه حساسه جدا و انا متوقعه ليها مستقبل ادبي كبير انشاءالله

    فرحت قوي لما لقيتها بتتكلم في مدونتها عن زمان حسيت اني مش لوحدي في الشعور ده فعلا بحس كتير بالحنين لزمان رغم اني معشتوش بس كان نفسي اعيشه بحب قوي الاغاني القديمه و الافلام القديمه صحابي بيفتكروني اتجننت لما يلاقوني بسمع عبده الحامولي ولا عبد الغني السيد و دايما يتريقو عليا (ايه اللي بتسمعيه ده يا بنتي؟؟)
    يوم 6اكتوبر اللي فات كنت بقول لماما يا بختك عشتي الانتصارات بصيتلي باستغراب كاني اتهبلت وقالتلي يا بختنا احنا انتو زمانكو في الموبيل والدش وكل الفاهيات اللي احنا محلمناش بيها
    قلتلها انتو عشتو النكسه وفرحه النصر في اكتوبر جمال عبد الناصر والسادات واغاني الثوره واكتوبر وحتى اغاني النكسه
    زمان كنتو عايشين لهدف و كل الناس عندها حلم واحد النصر وكلهم كان عندهم فرحه واحده كل دي حاجات كنت بتمنى اعيش يوم واحد منها
    بصيتلي بعدم اقتناع وسكتت بس الحمد لله اكتشفت اني مش لوحدي في الشعور ده شكرا رضوى

    Sunday, October 16, 2005

    Too good to be true

    طول عمري كنت برفض ادخل في اي علاقه مع اي شخص مش مقتنعه بيه و لو بنسبة 1% اي واحد كان بيحاول يتقرب مني كنت بصده في ثواني لما احس اني جوايه ذرة عدم ارتياح ليه
    احيانا كنت بصد و برفض ناس بدون اي عيوب بس كان احساسي بيقولي مش ده استني شويه و رغم قلقي اني يمكن اكون غلط و اكون بضيع من نفسي فرصة عمري كنت برفض

    دايما كنت مؤمنه اني لازم لما احب احب مره واحده و اللي احبه ده يكون اول انسان في حياتي كنت شايفه ان ده ابسط حقوقه عليا و كنت مقتنعه بكده تماما كمان كنت مقتنعه ان اللي هديلو قلبي هيكون اول واخر انسان في حياتي

    عشان كده كنت برفض ادخل في اي علاقه مش شايفالها مستقبل..كنت برفض اعمل حاجه اندم عليها في المستقبل

    منكرش اني احيانا كنت بفقد الثقه في مبادئي بس لثواني كنت بحس اني غلط و هضيع عمري في الهتافات بس برضه و لا مره قدرت اغيرها
    كنت بحس اني مش هحب ابدا و هفضل طول عمري وحيده و هندم على الفرص اللي ضيعتها كل صحابي كانو بيقولولي كده و بيتنباولي بالمصير ده ..كانو بيقولو عليا معقده

    الغريب انك لما دخلت حياتي مترددتش ثانيه واحده من اول لحظه كنت حاسه انك انت اللي بدور عليه من زمان مفكرتش في عيوبك و كبرتها زي ما كنت بعمل زمان محللتكش مفكرتش في حاجه غير اني بحبك

    يمكن ترددي كان لاني خايفه ايوه خايفه تكون انت مش متاكد او تكون اتسرعت لان كل حاجه حصلت بسرعه قوي كنت خايفه اندم بس انت كنت حاسس اني مش متاكده من مشاعري و ده كان بيقلقك
    يمكن زي انت ما بتقول انا كنت خايفه افرح كل حاجه كنت بدور عليها طول عمري لقيتها كده كنت حاسه ان الموضوع كله احسن من انه يكون حقيقيtoo good to be true
    هو انا كئبيبه؟؟؟؟